Wees stil

Wanneer die storms om jou woed en die winde van verandering waai jou hare skoon in ‘n ander-verkeerde windrigting in… dan maak jy maar soos Dory; “Just keep swimming.” Vriendin omdat ek en jy nie met vinne uitgereik is daar doer in die begin toe God ons met kunstigheid in die skoot van ons moeder aanmekaar gesit het nie, sit ons maar eerder net een voet voor die ander, en nog ‘n voet na daardie voet… en ons hou aan loop. Ek wil jou onderrig en jou die pad leer wat jy moet volg. Ek wil jou raad gee en my oog oor jou hou. (Ps. 32:8)

Wanneer die opdraende, klipperige lewenspad eindeloos voor jou uitstrek en die krag is min en die moed is op dan leef jy van dag tot dag. Dan maak jy soos die ou bekende Country liedjie sê: One day at a time sweet Jesus…

As die dag eindeloos voor jou uitstrek en jy sien eenvoudig nie kans vir nog een treëtjie vorentoe nie, dan vat jy dit ‘n uur op ‘n slag en jy maak dit doenbaar, haalbaar, want alleen is jy verseker nie, moeg, miskien moedeloos, maar nie alleen nie. Die wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie. (Jes. 40:31) En Hy sal jou krag gee en jou krag wees wanneer jy dit die heel nodigste het.

Soms, bevind ons onselwers in die seisoen van moeg gestap, moeg van vorentoe beur en nêrens kom nie. En vriendin al wat oorbly is vashou aan Hom, aan Sy beloftes… al wat oorbly is bid en smeek vir uitkoms en oorlewing. Dis ook in hierdie seisoen wat jy ‘n paar dinge van hierdie God van jou onthou en dit vasmaak in jou hart eens en vir altyd.

God is met jou… altyd. Al voel jy so bietjie alleen, al voel jy selfs ‘n bietjie God-verlate. En die “Just keep swimming” mentaliteit beteken nie jy is stoksielalleen nie. Onthou jy vir Dawid wat in Psalm 23:4 verklaar: Al gaan ek ook in ‘n dal van doodskaduwee, ek sal geen onheil vrees nie; want u is met my: U stok en U staf vertroos my.

Hierdie “Keep on swimming” mentaliteit vereis nogals ‘n paar ekstra KJ’s, maar jy hoef nie paniekerig te begin spartel nie. Hy gee jou die krag om aan te gaan en aan te gaan. Een voet voor die ander… Liewe vreindin, jy mag net nie moed opgee en begin sink nie. Sy genade sal vir jou genoeg wees. Hy wat in jou is sal jou die nodige krag gee… Wie reg het, loop sy pad, wie rein voor God is, neem toe in krag. (Job 17:9)

Soms wanneer die aanhou swem net nie meer kan nie, net nie meer ‘n opsie is nie, dan dop jy om en jy dryf bietjie, jy rus bietjie. Met jou oë gerig na die hemele en die die blou-blou lug. Heilige Gees sal daar langs jou dryf tot jy weer kans sien vir koers vat. Ver uit die vreemde uit, in wanhoop, roep ek na U. Bring my op ‘n rots waar ek veilig sal wees. (Ps. 61:3) En ja, soms sink ons so bietjies-bietjies, maar Vader sal jou uit die malende dwaalkolk uithaal en jou op ‘n veilige rots laat staan. Die rots wat Jesus is wat vir jou ‘n ewige skuilplek is wat vir jou ‘n rus-plek is te midde van die eindelose oseaan om jou.

“Well then, how are we gonna do that unless we give it a shot and hope for the best?” (Dory) Gelukkig hoef ek en jy nie te hoop op die beste nie, ons hoop is altemit gevestig in Hom en Hom alleen.

Vriendin as jy so aan’t swemme is, hou maar die wilde gedagtes op hok, want gedagtes wat op loop gaan en gedagtegange wat maar neig na negatiwiteit en swartgalligheid. Ek en jy moet konsentreer op die hier en nou en die wat asse afsweer, dis die sê-nou-maars- al die bobbejane agter die bulte- wat maak dat ons besluit om op te hou swem, wat maak dat ons uiteindelik opgee. Maar moenie net aan die vroeëre dinge dink en by die verlede stilstaan nie. (Jes. 43:18) Set your gaze on the path before you. With fixed purpose, looking straight ahead, ignore life’s distractions. (Prov. 4:25 The Passion Translation)

Vriendin vir jou wat die kuns vervolmaak het om aan te hou swem te midde van aardverskuiwende probleme en situasies… vir jou bid ek die vermoë toe om soos Jesus in die buik van die boot te slaap, vol vrede, te midde van die lewensstorms wat die bootjie wil laat omkantel. Gelukkig tog, die EEN wat die storms stilmaak het jóú lief. Hy sal elke storm in jou hart en siel stilmaak as jy Hom net vra, en vertrou, en liefhet. ‘n Stille vertroue, ‘n stil-wees en vertrou dat Hy God is hoog bo die nasies en hoog bo die aarde. (Ps. 46:11) Hoog bo alles en almal.

Ons vergeet al te vinnig, God is reeds in ons toekoms, net soos Hy nou net hier op hierdie oomblik by jou is, soos Hy in die verlede elke sekonde van elke dag by jou was. Hy sal jou nimmer as te nooit alleen en verlate los in jou oseaan van verdriet en onteltenis nie.

Lewe asof Christus gister gesterf het, vandag uit die dood opgestaan het en ons môre op die wolke kom haal. (Theodore Epp) So my liewe Dory vriendin, beur vorentoe, kyk op, vertrou en glo.

Vriendin, vertrou liewer op die Here en doen wat goed is, woon en werk rustig voort. (Ps. 37:3) God sal die details uitsorteer, te midde van al die spoeg en spartel, sal alles ook vir jou ten goede uitwerk. Hy het my uitgetrek uit die put van die dood, uit die slymerige modder, my op ‘n rots laat staan en my weer op vaste grond laat loop. (Ps. 40:3)