Category: Wees Stil

Posted on

My top 7 Gunsteling Versies…

En presies hoe hulle my regop hou, staande hou aan die einde van ‘n té besige jaar.

Dit was interessant, ek het gedink ek gaan sukkel om 14 versies te kry, maar ek was verkeerd, want daar is te veel versies wat regtig my hart aanraak, wat eintlik super persoonlik is… miskien lyk jou lysie geheel en al anders, dis ook reg! (Volgende week deel ek nog 7, anders raak hierdie blog-inskrywing net te lank!)

  1. Bedaar en erken dat Ek God is, Ek is verhewe bo die nasies, Ek is verhewe bo die nasies. (Ps. 46:11 2020)

Be still and know that I am GOD.
Be still and know that I AM…
Be still and KNOW…
Be STILL…
BE…

Ek vermoed hierdie versie is nie net in my oorlewings-tassie vir einde van die jaar nie, maar gegraveer op my hart as my lewens-versie. Ek dink hierdie versie gaan minder oor stil bly en stil wees, dit gaan meer oor die anderkant, WIE aan die anderkant van daardie stil wees is. Ek en jy kan stil wees, want Hy is aktief besig. Ons kan in stilte op Hom wag, kommerloos, vol moed en vrede, want

Hy is besig…
Hy sluimer nie,
Hy slaap nie.

  1. Whenever my busy thoughts were out of control, the soothing comfort of your presence calmed me down and overwhelmed me with delight. (Ps. 94:19 TPT)

Hoor hier, ek weet nie van jou nie. Hierdie tyd van die jaar het ek behoorlike besige gedagtes, van alles wat gedoen, gekoop, gepak, gebak, getoedraai, opgeslaan, weggebêre en saamgevat moet word. En vir een of ander onverklaarbare rede, is die tyd wat ek begin kaste regpak! Ai ek weet, is daar nie genoeg goed alreeds om my en my gedagtes aan die gang te hou nie?

MAAR… ek doen dit nie alleen nie, want Sy alomteenwoordigheid vou my toe in ‘n kokon van liefde en vrede, ten spyte van die lysies en die sub-lysies en die moet-nog-doen-lysies!

  1. Vertrou op die HERE met jou hele hart… (Spr. 3:5 2020)

Vir my is God in alles en die waarheid is: ek is 100% afhanklik van Hom. So ek en jy moet leer om Hom te vertrou met ALLES. Ons moet met oorgawe kan agteroor val met die vaste wete dat Hy ons verseker sal vang, elke keer… Hy is ons Helper, ons Rots, Hy is die groter-prentjie Siener. Hy is onveranderd en nog van altyd af in beheer.

  1. In my hart koester ek U woord… (Ps. 119:11)

Koester beteken eintlik maar net: in jou binneste lewendig hou en groei. Hoe mooi is dit? Om die Woord van God lewendig te hou in jou hart en daaroor na te dink, dit jou eie te maak, en toe te laat dat die Woord (Jesus) jou kom verander, vernuwe en versterk! Your word I have treasured and stored in my heart (AMP)

Wat ek ook hou van hierdie aller kosbaarste versie, wanneer dit woes-woes gaan, dan kan jy net terugval op dit wat jou hart reeds weet. Op elke vers wat reed in jou hart ingegraveer is.

God is good all the time and all the time God is GOOD!

  1. Hy wat in die beskutting van die Allerhoogste woon, sal oornag in die skaduwee van die Almagtige. (Ps. 91:1 2020)

Woning, daar waar jy tuis is. Daar waar jy veilig is, daar waar die elemente en die warm son jou nie kan bykom nie. Ons woon net saam met mense wat ons ‘n verhouding het mee, anders is ons loseerders en nie deel van die binnekring nie. Hoe kosbaar is hierdie Woord? Is jy in die binnekring liefste vriendin, is Hy jou Abba by wie se huis jy nie net tuis is nie? Maar o, so-so welkom?

  1. Julle krag lê in stil wees en vertroue hê. (Jes. 30:15 1983)

Met hierdie versie het my hart en my gees al lekker gestoei. Krag=stil wees + vertroue. Dis omdat dit lyk soos ‘n wiskundige vergelyking dat ek sommer holderstebolder die ander rigting wil in vlug!

Helaas dink ek tog na al die stoeiery is ek en Jesaja 30 vers 15 nou op dieselfde bladsy. Die allerbeste wat ek en jy kan doen is om telkemale, aanmekaar terug te draai na God. Om te vertrou op Sy voorsiening en beskerming, om te vertrou dat Hy ALTYD ALLES ten goede laat meewerk, al lyk dit soms nie so nie, al voel dit soms nie so nie!

Jy kan jou antwoorde in die wêreld gaan soek, jy kan jou vertroue verplaas na self, en geld, en werk, en sukses… maar jy gaan jou krag nie daar vind nie, en jy gaan beslis nie vir God daar tussen werk en sukses gaan uitkrap nie. Want My en jou krag lê in God, en elke belofte in Sy Woord. As ons dit kan regkry om stil te wees ten midde van die storms en net op Hom te fokus sal ons Sy krag in ons op ‘n nuwe manier ervaar.

  1. Ek het jou op jou naam geroep, jy is MYNE! (Jes. 43:1 1983)

Hoe mooi is die versie? Ek dink dit kom lê en val veral sag op ‘n vroue-hart wat nie elke dag lekker weet: Wie is ek nou eintlik, regtig?  Dit is wie jy is… en dit is wie ek is… ons is Syne. So ken Hy ons elkeen, intiem, op die naam! Hy ken jou hart se storie, jou grootste seer, jou mooiste oorwinning, jou diepste begeerte. Dit is Hy wat jou op ‘n wonderbaarlike manier in die skoot van jou moeder aanmekaargeweef het.

Hy weet presies hoe moeg jy is aan die einde van hierdie jaar. Hy sien elke sug, elke traan wat jy iewers alleen gestort het. Hy weet wat jy alles vermag het, wat jy alles nog wou doen… Vriendin, HY SIEN JOU! Mag Sy goedheid en guns jou vooruitgaan in hierdie laaste stukkie van die jaar.

 

Posted on

Vakansies en Verandering.

Die slim mense sê ‘n verandering is so goed soos ‘n vakansie… dan wil ek net vandag sê ek kies oor en oor, weer en weer eerder die vakansie deel. Nee, ek hou nie van verandering nie, dit skud my hok, dit tip my boot, dit is eenvoudig nie vir my lekker nie… en dit was nog van altyd af so… maar nou met ousus wat huisverlaat, darem nie hart nie, en nuwe jaar met nuwe dinge… ja wel laat ek net sê, my hok is behoorlik geskud en dis net vere waar jy sien…

Die slim mense sê ook dat die enige konstante ding in mens se lewe is verandering. Jy sien my dilemma, ek moet balans vind, voete vind in ‘n wêreld wat konstant anders lyk, ja die mens is sosiaal lekker aanpasbaar, maar dis nie te sê die aanpasbaarheid kom so natuurlik vir almal nie. Nietemin, ek kan eerlik sê, wat verandering aanbetref, is ek nie waar ek was ‘n paar jaar gelede nie, maar ek is beslis nie waar ek wil of moet wees nie.

Ek het lekker geoefen met die verandering besigheid deur twee groot trekke in die afgelope 17 jaar, nuwe provinsies, nuwe dinge, nuwe mense. Verandering veroorsaak ‘n groot ongemaklikheid in my siel… jip en dit steel klein bietjie van my vreugde en ‘n titseltjie van my vrede ook. Dit het ook ‘n geneighdheid om stress en bekommernis aan te blaas en natuurlik vrees. Vrees vir verandering. Miskien moet dit eerder die opskrif wees.

En ja daar is ek mooi netjies terug by die Wees stil tema- ‘n her-eksamen (alweer) van soorte. Ek moet ook sê dis nie ‘n Jes. 30:15 hereksamen nie, dis meer die Psalm 46:11 weergawe.

Jy sien die Jesaja versie sê mos dat jou KRAG lê in STIL WEES en VERTROUE hê… die vertroue ding het ek nou mooi onder die knie want dit was die 2022 tema waarmee God regtig intens met my gewerk het. En as jy 1000 keer hoor. Vertrou My! Jy kan My vertrou! Onthou van die vertrou-ding! Ek is betroubaar. Dan glo jy dit later verseker en ek kan met oorgawe sê dat Ek Hom met elke vesel van my wese vertrou… met my man, met my girls… met absoluut alles. Hy het ‘n plan, ek is veilig in Sy hand.

Die probleem met die Jesaja versie is vir my die balans ding- sien omdat die vertrou ding reg is maar die STIL WEES deel kort nog baie aandag (alweer) lei die krag deeltjie daaronder. Want mens voel kragteloos wanneer jy nie lank genoeg stil word om te hoor, in te drink en te verstaan nie.

So dan bring dit my terug by Psalm 46:11 (NLV), “Wees stil en weet Ek is God!” Ek is ook lief vir die The Passion Translation se weergawe: Surrender your anxiety! Be silent and stop your striving and you will see that I am God, I am the God above all the nations, and I will be exalted throughout the whole earth.

Gee oor, nie op nie. In die stilte is dit juis waar jy die grootheid van God ontmoet,  waar jy werklik Sy krag ervaar. Dit lyk vir my daar lê vir my ‘n paar wees stil toetsies voor in die jaar…

Ek dink sommer nou aan die versie in 2 Timoteus 1 vers 7: en Ek besef die Gees wat God my gegee het, maak my immers nie lafhartig, maar vul my met krag, liefde en selfbeheersing… die NKJV se vertaling sê in die plek van die woordjie selfbeheersing- a sound mind. Ek dink soms is ek en jy ons grootste vyand… ons verhinder soms die Gees van God, wat in ons woon, om Sy werk in ons en met ons te kan doen, want ons sukkel met die stil wees deeltjie.

En ek weet ek is nie die enigste een wat daarmee sukkel nie, want ons bly in ‘n wêreld met oorverdowende konstante lawaai. ‘n Wêreld waar stilte eintlik abnormaal geraak het. ‘n Wêreld waar stil wees en word ‘n doelbewuste besluit en keuse is. (net sommer ‘n voetnota vir self en vir jou liewe vriendin, skerms van enige soort steel nie net tyd nie, maar ook jou vrede en tye van stilte wat vervang word met wêreldse geraas en dinge)

Wat ek geneig is om te doen wanneer verandering my vol in my gesig tref en daar is geen ander keuse as vorentoe nie, die dinge waaroor ek wel beheer het sorteer ek uit met ‘n passie, ek wil alles NOU doen en gedoen hê en behoede jou siel as jy nie so vinnig soos ek dink en doen nie, en die probleem met dit is my liefste vriendin dit veroorsaak nie net eindelose spanning en stres nie, maar dit kan ook lei tot onnodige konflik.

So nog iets waaraan ek sal moet werk die jaar. Vir nou het ek net werk wat voorlê en min antwoorde en oplossings. Ek verklaar dat 2023 my Wees Stil jaar gaan wees.

Here, help vir my met dit asseblief. Ek het nodig dat U my wys en leer hoe om ordentlik stil te word, regtig stil-stil te word, ‘n stilte wat deursypel na liggaam, siel en gees. Here, hier is ek! Ek het vanoggend meer vrae as antwoorde, meer vertroue as stilte en eintlik wat ek soek is U, maar nietemin, hier is ekke! Dankie my Jesus vir U vrede en ‘n stille gemoed vol vertroue en krag wanneer ek dit die nodigste het. AMEN.

Posted on

Uitstapdae, Vertroue en Genade Onbeskryflik Groot.

En voor ek my  oë kon uitvee het die uitstapdag van die matrieks gekom en gegaan. So ook die 12 jaar van skool, van baba liefielyf, kleuter-geite, tween-buie, tiener-dinge, net so in ‘n oogwink staan ons eersgeborene, voor ‘n nuwe deur, met die deur agter haar wat wil-wil toeslaan… ‘n deur wat geen huiwering toelaat nie, ‘n finale deur. Maar sjoe die deur voor haar is woes opwindend… sy sien uit, ons sien uit vir hierdie nuwe seisoen in ons, maar veral haar lewe.

Die laaste dag van skool neem ek my vroeg-vroeg voor dat ek nie ‘n tjankbalie gaan wees nie, ek gaan nie dáái ma wees nie, ek gaan vir my gedra en my emosies net ‘n bietjie dieper in my hartkamers indruk, vasdruk. Vir later prosessering wanneer ek die die tyd, die lus en die krag het. Continue reading “Uitstapdae, Vertroue en Genade Onbeskryflik Groot.”