Om geken te word deur HOM!

Ek het jou op jou naam geroep, jy is Myne. Ek het jou gevorm, Ek het jou gemaak. Jy is vir My kosbaar en Ek het jou lief. (Jes. 43:1,4,7) My liefde vir jou is onverganklik. (Ps. 103:17) Ek ken jou, Ek sien dwarsdeur jou. Ek ken jou gedagtes nog voor hulle by jou opkom. Ek het jou mensekind op ‘n wonderbaarlike wyse geskep. (Ps. 139:1-2,14) Ja liewe kind, jy is as beeld van My geskape. (Gen. 1:27)

Liewe kind, Ek het jou voor jou geboorte al geroep; toe jy nog in jou moeder se liggaam was het Ek jou op jou naam genoem. (Jes. 49:1) Voordat ek jou in die moederskoot gevorm het, het Ek jou geken, nie van geweet nie…geken. Voordat jy gebore is, het Ek jou aan My gewy. (Jer. 1:5) Ek ken jou op jou naam, Ek is jou goedgesind. (Eks. 33:17) Ek ken jou wat aan My behoort. (2 Tim. 2:19)

Ek is by jou, Ek hou jou vas. (Jes. 41:10) My gedagtes vir jou is wonderlik. (Ps. 139:17) Ek het My genadegawes aan jou gegege. (Rom. 11:29) Jy is volgens My besluit geroep, ook vir jou sal ek alles ten goede laat meewerk. (Rom. 8:28)

Jy behoort aan My, ‘n nuwe mens, die oue is verby die nuwe het gekom. (2 Kor. 5:17) Ek gee vir jou ‘n nuwe naam, ‘n naam wat Ek self vir jou gekies het. Jy sal genoem word: “Die een vir wie die Here liefhet.” (Jes. 62:2,4) Jou naam is in My handpalms gegraveer. Vir jou sal Ek nooi ooit vergeet nie. (Jes. 49:15-16) Jy is vir My baie werd, selfs die hare op jou kop is getel. (Matt. 10:30-31)

Ek het jou nog altyd liefgehad, met ‘n geduldige liefde. (Jer. 31:3) Luister na My stem… en volg My. (Joh.10:16) Jy ken My stem, Ek ken jou op jou Naam en sal jou lei. (Joh. 10:3) Ek ken jou wat My nog altyd liefgehad het. (1 Kor. 8:3) Jy is afgesonder vir My. (1 Pet. 2:9)

Vind jou vrede in My, (Joh. 16:33) loop en lewe in die Lig. (Joh. 8:12) Elkeen wat My Naam aanroep sal gered word. (Rom. 10:13) Maak oop die geskenk van genade… dis verniet. (Ef. 2:8)

Verstaan jy steeds nie liefste kind? Ek het jou lief en Ek is bly oor jou. (Jes. 62:4-5) Ek het jou nog altyd opgetel en gedra wanneer die lewe se storms om jou woed. (Jes. 63:9) Ek omsluit jou van alle kante. (Ps. 139:5) My trou beskerm jou aan alle kante. (Ps. 91:4) Ek is by jou en sal jou beskerm waar jy ook al gaan… (Gen. 28:15) nou en vir altyd…