Voel jy ook soms om te vra of God jou werklik lief het? Vir jou, persoonlik, nie die mensdom of die wêreld nie, maar vir jou met al jou foute en dinge wat maar pla en skaaf. Dat Hy jou op jou naam ken, dat Hy jou intiemste hartsbegeerte ken, dat Hy letterlik weet hoe jy aanmekaar gesit is? Wat in jou alledaagse lewe aangaan… van wasgoed, kos, werk, huwelik? Van sukkel en struikel, stres en bekommerd wees… Ken God elke hoekie van jou hart en siel, en ten spyte daarvan… vra jy ook: Het U mý lief?
God het elkeen van ons só lief,
asof daar net een van ons is om lief te hê.
(Augustinus)
God is aan my en jou kant. Sy liefde veg vir ons en namens ons. Hy kies jou oor en oor, weer en weer. Dis juis hierdie liefde vir my en jou wat ons deur elke dag dra. Ons worsteling op aarde is nie alleen nie, God se liefde is ons versekering en skuilplek.
Sy liefde is ook nie ‘n omdat liefde nie. Hy het jou nie lief omdat jy dit of dat nie, Hy het jou lief ten spyte van imperfeksies, en al jou menslike foute. Sy liefde vir jou sal jou genees, beskerm en regop hou. Sy liefde is onpeilbaar en jou rusplek teen die storms van die lewe. Hierdie liefde is volmaak en oneindig, en absoluut niks kan jou ooit skei van hierdie liefde wat God vir jou het nie. (Rom. 8:35-39)
Ek het vroeg reeds besef: God is my bondgenoot. Ek kan Hom alles vertel. En Hy sal my nog altyd liefhê. (Jim Conway)
Wat ‘n tragedie sou dit wees as ons vir een enkele dag sonder God se liefde moes klaarkom? Sy ewigdurende liefde wat die lig is op ons pad en lewe? Wat nie uitgeput kan word nie, want God se liefde is gebaseer op genade.
Die vyand se grootste begeerte is dat ons tog nooit besef, nooit agterkom presies hoe lief God ons het nie. Dis presies waar hy jou wil hê; daar waar jy ongeliefd en oorgelaat aan self voel. Alleen in ‘n gebroke wêreld met ‘n gebreekte hart.
Vertrou God se hart vir jou. Raak bewus van jou menslike hand in Sy Goddelike hand. Vind rus in Sy liefde vir jou. God het jou lief omdat Hy jou lief het want Hy is immers liefde. Sy liefde vir jou het Hy bewys aan ‘n growwe houtkruis 2000 jaar terug. Dis gedoen. Watter bewys soek ons dan nog? Wat meer moet God doen om jou te oortuig dat Hy jou innig liefhet, dat Hy jou eerste liefgehad het?
Maar God bewys Sy liefde vir ons juis hierin dat Christus vir ons gesterf het toe ons nog sondaars was. (Rom. 5:8) God se liefde kyk verby ons sonde, mind you, nie dat ons net kan aanhou met ons sondigheid nie, maar God hou nie ons sonde teen ons nie. Hy het ons lief ten spyte van sondigheid en ‘n imperfekte wese.
Vriendin en God se liefdestaal vir jou is persoonlik, baie persoonlik. Hy ken elke liewe voorkeur en afkeur van jou, Hy is wel bekend met jou hart, jou hede verlede en meer nog so jou toekoms.
Ek sien en beleef God se liefde vir my op verskeie maniere, deur Sy Woord, ‘n mooi lied, houtdeure, bome, die wind wat deur die blare ritsel, die reuk van reën, mooi klein, kosbare voëltjies, donderweer, die aandstilte, ‘n sonsondergang, grondpaaie, berge… ag amper te veel goed om op te noem. Selfs in my drome voel ek soms Sy liefde.
God se liefde stel nie so baie belang in die vrou wat jy dink jy kan wees, of behoort te wees nie, God stel belang in jou hart, die ware jy. Maria los nie verniet vir Martha om al die werk te doen nie, dit spruit nie uit ‘n luiheid uit nie, maar uit ‘n begeerte om naby Sy hart te wees, haar wese smag na die hart van God. Die een ding wat Maria reg kies, is ‘n hart gefokus op die liefde wat die God van die heelal vir haar het en om Hom te wys: U is belangrik genoeg dat ek die geraas van die wêreld sal ignoreer, solank ek net tyd saam met U kan spandeer! Kry jy dit soms reg om soos Maria te wees, om net te los en by Sy voete neer te sak en te wees?
‘n Dogtertjie wil klein-klein al weet: Bemin jy mý? Is ék belangrik? Is ék geliefd? Is ek waardig? Is ek genoeg? Niks verander wanneer ons volwaardig vrou is nie. Ons vra nog dieselfde vrae, net met ‘n groter dringendheid en ‘n behoefte aan antwoorde. Spits jou oortjies vriendin, skryf dit in jou hart: Niemand het jou so lief soos God op hierdie spesifieke oomblik nie… Sy hart skree uit:
My liefde vir jou sal nooit verdwyn nie. (Jes. 54:10) Ek het jou eerste liefgehad. (1 Joh. 4:19) My troue liefde is meer werd as die lewe. (Ps. 63:4) Ek hou my liefde oor jou. (Ps. 33:22) Bly in My liefde en (Jud. 1:21) onthou altyd, Ek is altyd by jou, waar jy ookal gaan. (Jos. 1:9) Ek is getrou in My liefde vir jou. (Ps. 109:26)
God is liefde. (1 Joh. 4:8)
Ek en jy is Sy geliefdes…
Sy liefde is onmiskenbaar.
Vir ewig.
Diep.
Volkome.
The Lord your God is in your midst,
A Warrior who saves.
He will rejoice over you with joy.
He will be quiet in His love [making no mention of your past sins]
He will rejoice over you with shouts of joy.
(Zeph 3:17-19 AMP)