Wat is ‘n Ma?

(Opgedra aan my regte egte Ma en my ander Ma)

‘n Ma is gemaak van staal, liefde, uithouvermoë en ragfyn kant. Haar vel is lekker dik, sy steur haar min aan tiener buie en geite. Sy weet ook baie goed, tieners sê selde wat hulle bedoel en bedoel selde wat hulle sê. In haar diepste wese is sy aanmekaar gesit met ‘n tikkie wysheid, oorvloed geduld en ‘n goeie handvol genade. Moet nooit vergeet nie: ‘n Ma was ook eendag op ‘n reëndag ‘n tiener, en as sy baie mooi en baie ver terug dink kan sy onthou van ‘n onsekere dogtertjie wat in ‘n jongmeisie lyf vasgevang was.

‘n Mamma hart is groot, daar is altyd plek vir nog enetjie, dis groot genoeg om ‘n ander mamma se kinders ook lief te hê! Weet maar net dieselfde mamma het ‘n hart van ‘n leeuwyfie, sy sal haar kinders ten alle koste beskerm en veilig hou. Sy bid al vandat hulle bitter klein is vir haar eendag se skoondogters en skoonseuns. ‘n Biddende ma bid vir haar eie kinders, maar ook vir die kinders van die wêreld.

Soms bly daar vir ‘n ma niks anders oor as om te bid vir wysheid nie, eers bietjie te dink, te bid en dan te praat. Haar druppels wysheid uit die hemel se skatkamers smeek sy af van die God van die hemel en die aarde.

Soms, vir ‘n oomblik is ‘n ma van onsekerheid aanmekaar gesit, en sy het nie altyd al die antwoorde en al die wysheid in pag nie, sy voel soms oormoeg en soms ‘n bietjie moedeloos, maar nooit vir te lank nie. Soms breek haar hart en sy huil saggies waar haar kinders haar nie kan sien nie, maar dis altyd kortstondig, want sy weet sy het baie om voor dankbaar te wees en Sy weet die groot Vertrooster vat haar hand elke keer sonder vrae, sonder om te vra: “Wat is verkeerd?”

Dis verseker ook so dat ‘n ma soms moet weerloos wees, en soms moet sy kan huil sodat die mense in haar huis en veral haar kinders weet sy is ook maar net mens, onvolmaak, onperfek…feilbaar. Ma’s weet hulle is nie volmaak nie, allesbehalwe, hulle weet ook dat daar partykeer niks anders oorbly as om te sê: Ek was verkeerd. Ek is jammer. Vergewe my.

‘n Ma is selde nie besig nie, daar is altyd nog iets wat moet gedoen word, ‘n ma word nooit moeg om goed te doen nie (Gal. 6:9) By die werk, by die kerk, by die skool. ‘n Ma hou nie daarvan om na haar kinders se baie verskonings te luister nie… maar sy is die ene wat vinnig verskonings namens hulle maak by ander mense. ‘n Ma kan alles doen en alles wees in een: Berader, taxi, kitsbank, aanmoediger, noem dit maar op, sy is dit reeds.

‘n Ma moet so ingestel wees op die welsyn van haar kinders, groot en klein, dat sy die seer raaksien in hul oë lank voor die emosies soos lawa by ‘n berg uitskiet, lank voor die hartseer en teleurstelling stofpaadjie-trane oor hul wange loop. Al beleef ‘n ma soms hand-in-die-hare oomblikke en voel sy alleen ten spyte van rumoerigheid en oproerigheid in die huis, is dit God wat haar telkemale per dag in Sy arms in trek. Wat haar oor en oor verseker, jy was nog altyd genoeg.

Daar kom tye dat ‘n ma se hart so vol bekommernis is dat sy skaars kan asem kry tot in haar longe, wanneer sy in ‘n enkele moment ‘n paar jaar ouer en gryser word, maar wanneer sy weer onthou om asem te haal dan hoor sy so duidelik die stem van God wat sê: Werp jou bekommernisse op My want Ek sorg vir jou en jou kinders en jou man. (1 Pet. 5:7)

Daar is baie genade uit die hemel vir hierdie ma-wesens wat dikwels meer as 24 uur per dag aan die gang is, wat pleisters opplak, eina’s gesond soen en eers rustig kan slaap as haar eie kroos veilig in die bed is. ‘n Ma deins nie terug vir Goliat uitdagings nie. Sy pak die bul by die horings en sy doen wat sy moet doen omdat sy kan, want sy is ‘n ma wat weet waar haar daaglikse brood en krag vandaan kom.

Elke ma leef met die besef in haar hart dat sy elke minuut van elke uur van elke dag afhanklik is van die EEN wat haar gemaak het. Soms wanneer jy mooi kyk, kan jy sien hoe ‘n ma die glans van die hemel en die hart van God weerkaats. Soms hoor jy hoe sy saggies met Hom praat, kompleet asof Hy daar reg langs haar staan.

Weet jy wat is die mooiste deel van ma-wees? Jy hoef nie by die berg op te sukkel om God te gaan ontmoet nie, nee wat, Hy kom sommer af en kom ontmoet jou tussen vuil wasgoed en skottelgoed wat nooit op raak nie. Hy kom ontmoet jou sommer net daar waar jy is, weet net in elke mamma se hart leef daar ‘n klein dogtertjie met ‘n wit rok wat altyd smag na haar eie ma, veral wanneer die lewe haar voete onder haar uitskop en sy weerloos en alleen op die klipharde grond bly lê.