Die Oorlog in my Kop.

In my twintigs was die geraas en die oorlog in my kop iets verskrikliks, dit was ‘n gespartel van epidermiese proporsies soos Oubaas altyd gesê het. Ek erken ek het eenvoudig nie die vermoë om aan NIKS te dink nie… dit is letterlik onmoontlik. My liewe man, en ek vermoed dis ‘n alle -man ding, kan wraggies aan niks dink… ek is so jaloers dat ek nie ‘n niks-boksie het nie.

Soms is daar ‘n hele ander wêreld van wat asse en sê nou maars in jou kop, jy maak oorlog met mense en dis so ver van die realiteit af en natuurlik is jy altyd reg! Dis ‘n gevaarlike plek om te ‘leef’. As jong getroude het ek soms so oorlog gemaak met my man in my kop, en ai as die arme siel by die deur in stap is ek klaar op die oorlogspad, oor goed wat in my kop gebeur het. Dis nie gesond nie en beslis onnodig! Ek het die ander dag ‘n oulike profile pic gesien. Dit het gesê: Don’t believe everything you think! Uitstekende raad.

Miskien is dit ‘n persoonlikheids ding? Ek weet nie, maar dis beslis oorerflik, ek sê altyd vir ousus wat soos ek aanmekaar gesit is: “Hou op oorlog maak in jou kop!” Ek vra vir haar die ander dag: “Hoe lyk die oorlog in jou kop?” Sy antwoord so met ‘n ondeunde laggie: “Die helfte van die mense in my kop se nekke is omgedraai”- daar het jy dit…

Wat in jou kop aangaan syfer af na jou hart toe en dit sit om in emosies, emosies soos haat, kwaad, hartseer. Genadige, liefdevolle gedagtes lei tot emosies van liefde, vreugde en vrede. Jy is wat jy dink…Lukas 6:45: Wat die hart van vol is, loop die mond van oor. Moenie glo nie, maar jou hart en jou verstand staan nie apart van mekaar nie!

Hou op oorlog maak in jou kop! Pasop vir die gedagtes wat jou hart vergiftig! Die teenoorgestelde van oorlog is vrede, as jy ‘n hart soek wat van vrede oorloop, wat jou verstand te bowe gaan dan sal jy die oorlog in jou kop moet stop, miskien het dit tyd geword om die wit sakdoekie te waai, die spreekwoordelike wit vlag aan die paal te laat wapper. Onthou op ‘n slagveld word nie slegs jou vyand beseer nie, jy gaan ook in die slag bly en seerkry.

As daar konstante negatiewe gedagtes in jou kop is, is ek nie seker hoeveel plek daar oor is vir die vrug van die Gees nie. Hoe stop jy die warboel negatiewe gedagtes? Miskien moet ons eers vir mekaar sê waar al die negatiewe goed en gedagtes wat in ons koppe in marsjeer vandaan kom want dit kom beslis nie van God af nie.

Ons stryd is nie teen vlees en bloed nie… so ons gedagtes van wanhoop, oorlog en moedeloosheid kom van die vyand af. Hy saai ‘n woord, of ‘n stukkie gedagte in jou kop, maar weet verseker hy is subtiel en skelm, dis nie asof hy sy teenwoordigheid uitbasuin en homself identifiseer nie! Hier is die trick, wat jy met die gedagte doen is jou KEUSE! Klink maklik genoeg…reg? Verkeerd! Dis harde werk en dit vat oefening om deur jou gedagtes te sif en te onderskei waar kom wat vandaan. Maar is dit ooit moontlik? Beslis!

Nooi sommer vandag die Heilige Gees in elke deeltjie van jou menswees in, selfs en veral in jou gedagtes. Die Woord van God het al die antwoorde op ons alledaagse moderne krisisse. Hoor mooi wat sê Paulus in Filipense 4:8 vir my en jou: Verder, alles wat waar is, alles wat edel is, alles wat reg is, alles wat rein is, alles wat mooi is, alles wat prysenswaardig is- watter deug of lofwaardige saak daar ook mag wees-daarop moet julle julle gedagtes rig. Meet jou gedagtes: Is dit waar, mooi, reg, rein, prysenswaardig? As dit nie is nie, gooi die gedagtes summier uit jou kop uit.

Wees versigtig wat jy dink. Jou denke kan jou lewe ingrypend beïnvloed. (Spr. 4:23 DB) Die Engelse weergawe sê: Guard your heart. Dis ‘n werkwoord. Iets wat aksie vra van my en jou kant af. As jy jou gedagtes wil vul met iets, vul dit met die Woord van God. Een versie op ‘n slag.

Ek glo nie daar is ‘n wenner of ‘n verloorder as dit by die oorlog in jou kop kom nie, ek dink daar is net jy wat verloor. Altyd verloor, altyd seerkry. Dis nie nodig dat die vyand langer van jou steel nie. As jy wil oorlog voer doen dit teen die negatiewe gedagtes in jou kop. Ek vermoed die finale oorwinning van ons gedagtes gaan eers eendag in die hemel geskied, maar tot dan liewe vriendin los ek jou met die woorde van Kolessense 3:2: Rig jou gedagtes op die dinge wat daarbo is, nie op die dinge wat op die aarde is nie. Dink Jesus! Laat Hom toe om jou denke te vernuwe. (Rom: 12:2) Sit die helm van verlossing op jou kop, (Ef. 6:17) en neem elke gedagte gevange om dit aan Christus gehoorsaam te maak. (2 Kor.10:5)

Battlefield of the mind is ‘n oulike boek wat Joyce Meyer geskryf, beslis die moeite werd om te lees!