Ek het ‘n stoompot wat hard werk, winter en somer… veral noudat Eskom half ‘n sê het wat ons uiteindelik vir aandete eet. As die krag af is, is dit een pot geregte op my Cadac gasbottel, op voorwaarde alles moet daar in, vleis, groente, die werke.
Die stoompot maak ewe lekker bredies, kerries en allerhande lekker gesonde en minder-gesonde soppe. Aartappelsop is almal se gunsteling, want dit sluit cheddar kaas, spek en room in. Ruik, maar lekker! Aan die einde van die blog sit ek vir jou die resep by.
Die stoompot van my raak net met tye half skeef hier aan die onderkant, dan kom manlief die boom van die pot met ‘n hammer by, en vir die volgende paar maande staan en dans die pot nie op die stoof nie. So, met een van die boom-regsien oefeninge dink ek sommer aan die uitdrukking wat die oumense so lief voor was, dit het so iets geklink: “Moenie bekommerd wees nie hartjie, elke pot het ‘n deksel!”
As jongmeisie voel jy alleen en soek sommer al van jongs af die deksel wat by jou potjie pas, jou eie persoonlike deksel. (Dis as ons nou aanvaar vir hierdie oefening dat ons die potte is en húlle die deksels!)
Soos maar ook in die regte egte lewe en fisiese potte is daar nie ‘n een grootte pas op almal nie. Aikôna! ‘n Aim deksel pas nie op ‘n Hart pot nie, vir voorhandliggende redes. Die naarstigtilike soek na jou deksel kan nogals ‘n affêre afgee… die probleem is baie potte raak so opgeskeep met ringe, troues, rokke en dinge, dat hulle sommer meermale die eerste en beste beskikbare deksel gryp.
En hierdie desperate pot vat wat sy kan kry, want ai, sy is so bang sy is die pot wat op die rak agterbly en net stof vergader. En dit klink so bietjie soos ‘n gespottery, maar hoekom dink jy hou Hollywood liefdes nie? Hoekom eindig so baie mense se huwelike op die rotse, want dit gaan meermale meer oor die idee van trou en getroud wees as die Goddelike verbond tussen ‘n man en ‘n vrou.
Miskien kan ons bietjie Hollywood blameer vir die skewe beeld van “Happy ever after…” miskien is dit juis dit wat maak dat getroudes net ophou, opgee en uitklim. Of is dit ‘n geval van vergeetagtigheid? Jy wat vergeet het, dis die EEN wat ek kies om lief te hê, nou moet ek die EEN wat ek gekies het liefhê! ‘n Lewenslange toewyding aan ‘n ander. ‘n Gelukkige huwelik is harde werk, dit kom nie vanself nie.
Die troudag is ‘n druppel in die emmer van saamwees vir ewig, altyd en drie dae. Navorsing het bewys hoe groter en duurder die troue hoe groter die kans vir egskeiding. As jy nie so seker is van jou deksel nie, vra jouself af: Sal ek met hierdie persoon voor my trou as daar nie ‘n diamantring ter sprake is nie? Sal ek met hierdie persoon voor my trou, al is ‘n bring en braai al wat ons kan bekostig? Sal ek die peperduur troue opgee, (wat bestaan uit 8 strooimeises, 4 blommemeisies, ‘n ringdraer, ‘n dure fotograaf en ‘n kar wat koppe laat draai, ‘n oorsese wittebrood) want al waarna ek smag is om waaragtig aan die man wat voor my staan te behoort?
Is ‘n huwelik nie uiteindelik jy en hy wat julle onfeilbare, ewigdurende liefde aan mekaar plegtig beloof voor die God van die hemel en die aarde nie? Mens trou sekerlik nie met die gedagte dat daar ‘n agterdeur is nie? Want as jy die verkeerde deksel kansel toe sleep vir die verkeerde redes gaan jy sielsongelukkig wees vir die res van jou lewe met ‘n deksel wat nie lekker pas nie, al maak jy wat!
Maak seker.
Wag.
Bid.
As jy nie seker is van jou deksel nie, dan is dit belangrik om net op dieselfde bladsy te kom. Die vereistes vir die regte pasmaat vir jou sal natuurlik van persoon tot persoon verskil. Kies ‘n maat wat jou lief het net soos jy is, wat nie om elke hoek en draai aan jou probeer skaaf en verander nie. Kies ‘n lewensmaat wat jy volkome vertrou.
Soms is potte geneig om waarskuwingstekens te ignoreer, maar juis oor die gerak sittery hou hulle, hulle siende-blind en horende-doof. Luister altyd na die opinies van die mense naby jou hart. Hoor hier, niemand is vir jou so lief (dis nou voor deksel-dae) soos jou ma en jou pa nie. Hulle het hier op aarde jou eerste liefgehad, die langste. As hulle dingetjies uitwys wat skaaf en pla… luister gerus na hulle. Hulle lewensondervinding en goeie raad kan jou emmers en emmers vol trane spaar.
Kies ‘n man wat jy weet dat jy weet my, hart is veilig in sy hande. Kies ‘n man wat glo wat jy glo. Kies ‘n man na aan God se hart. Kies ‘n man wat jou raaksien vir wie jy is. Wat dink jy is waardevol, kosbaar en enig in jou soort. Wanneer jy uiteindelik die een kies wat jy gaan liefhê vir die res van jou lewe, kies dan elke dag opnuut om hom lief te hê met elke greintjie van jou menswees, dan weet jy verseker: my deksel is ‘n perfekte pas vir my potjie!
Aartappelsop uit die boonste rakke.
3 eetl botter
250g Spek stukkies
2 huisies vars knoffel fyn gekap
1 Ui fyn gekap
6 groot Aartappels (in klein blokkies gesny)
1500ml Hoenderaftreksel
250ml vars Room
Sout & Peper
150g Spek krakerig gebraai
Gerasperde Cheddar Kaas
Soteer die spek, knoffel en ui in die botter tot goudbruin. Gooi die Aartappel blokkies en hoenderaftreksel by en kook tot gaar en sag. Blits die sop fyn wanneer gaar. (nie te lank nie anders raak die sop trekkerig)
Geur na smaak met sout en Peper, roer die room by.
Gooi gerasperde kaas onder in elke sopbakkie. Skep sop bo oor en garneer elke bakkie met ‘n bondeltjie krakerige spek.♥♥♥♥♥