‘n Heel Hart.

Vandag se stukkie is bedoel vir jong harte wat nie skroom om die regte ding te doen nie, wat opstaan vir wat reg en goed is.

Beste raad wat ek vir jou kan gee is: Laat God toe om jou huweliksmaat van eendag namens jou te kies, so sal jy nooit as te nimmer die grootste fout van jou lewe maak nie. Bid sommer nou al vir jou lewensmaat van eendag, bid vir hom of haar vir wysheid, insig en ‘n uithouvermoë…

Die Here het man en vrou een gemaak, een in liggaam en gees. En waarom een? Omdat Hy wil hê dat daar ‘n nageslag moet wees wat Hom eer. (Mal. 2:15)

Eenheid in die huwelik gebeur wanneer ‘n man en ‘n vrou; wel een word. Dit is die voltrekking van ‘n huwelik. Wanneer jy voor die huwelik met iemand slaap, of eerder wakker bly, dan trou jy in werklikheid met daardie persoon, jy kort net die papiertjie om dit wettig te maak in die oë van mense.

Om nie voor die huwelik saam te slaap nie is ‘n wilsbesluit, en wanneer net een in die verhouding se voorneme is om dit nie te doen nie, sukkel dit soms maar so bietjie. Dis ‘n besluit wat ‘n paartjie saam met liggaam, hart en siel behoort te neem, want seks is nie ‘n lyflike-plesier-besigheid nie. Dis ‘n hart en gees ding en tot ons dit nie verstaan nie sal egskeiding aan die orde van die dag wees en ongelukkige huwelike ‘n instelling en gelukkige goddelike huwelike ‘n uitsondering.

Sien, die groot ding van die liefde is so mooi opgeteken in 1 Korintiërs 13. Die liefde is geduldig en wag graag, die liefde is vriendelik en plaas nie druk op ‘n ander nie, die liefde handel nie onwelvoeglik nie, soek nie sy eie belang nie en is nie liggeraak nie. As liefde nie aan dié vereistes voldoen nie is dit seer sekerlik nie liefde nie…

Ek wil darem net sê vir die wat hier lees wat ietsie baie kosbaar verloor het, waar toestemming nie betrokke was nie, waar dinge gevat is wat nie gegee is nie wil ek net sê, voor die Vader wat in die hemel is, is jy rein en mooi en onaangeraak. Daar is ook geen sprake van eenwording in liggaam en gees nie.

Toe ek jonk was is dinge soos voorhuwelikse seks selde bespreek, dit was ‘n fluister agter die hand en ‘n neerhalende kopskuddinkie wanneer ‘n paartjie oor die tou trap en die bewysstukke na ‘n paar maande duidelik sigbaar geraak het om die middel van die meisietjie. Jy het met min inligting besluit om nie voorhuwelikse seks te hê nie want in jou kop was daar ‘n Omie wat daarbo sit met ‘n swaaiende vinger, en boetie jy beter nie eers dink aan voorhuwelikse seks nie wat nog te sê van dit doen, jy was bang vir die bliksemstraal uit die hemel wat vir jou tref en al wat oorbly is ‘n bondeltjie stof en ‘n paar beentjies.

Ek wil vandag vir jou sê om nie voorhuwelikse seks te hê nie het bitter min uit te waai met swangerskappe of een of ander vieslike veneriese siekte. Dink jy die Vader wat daar bo sit het afgekyk op ons en besluit kom ons ‘spoil’ bietjie hulle ‘fun’ en sê hulle mag geen voorhuwelikse seks beoefen nie? Sommer maar net? Nee my liewe jongmens dit gaan oor jou hart en oor jou gees en geluk en bagasie in die huwelik wat nie daar hoort nie.

God ken jou en my hart in en uit, deur en deur. Sommige bagasie in die lewe raak te veel om te dra en wanneer jy dit sleep-dra in ‘n huwelik in, verdwyn dit beslis nie soos mis voor die son nie. God weet, en van altyd af was dit deel van Sy meesterplan, ‘n rein, heel hart raak deel van ‘n Goddelike heel huwelik waar vertroue, vriendskap en liefde in oorvloed is.

Hollywood, met behulp van die vyand, het ietsie so moois en kosbaar gevat en dit so verdraai, dat as mens na enige reeks kyk besef mens dit gaan oor die lyflike dinge. Ek wil sommer ietsie sê oor die topic van saambly, nee dis nie okay nie, en om te kyk of mens seksueel ‘compatible’ is, is ‘n leuen van die vyand wat regdenkende mense soos soetkoek opeet. Ai, ons kan regtig nie toelaat dat die vyand langer van ons steel, harte breek en verhoudings verwoes nie.

Seks kan nie ‘n stukkende verhouding heel maak nie, om die waarheid te sê, dit laat meermale die verhouding skipbreuk lei. As jy vir my lief is sal jy… nee die liefde wag… Ek het jou lief genoeg om te wag vir eendag, om met verwagting uit te sien na iets kosbaars en ongelooflik in die veilige grense van ‘n huwelik.

Ek het al met so baie vrouens gesels met huwelike wat in stukke op die rotse geland het, en weet jy wat was meermale die wortel van die kwaad? Voorhuwelikse seks, soms met die een wat hulle uiteindelik mee getroud is, want agv die eenwoording, die emosionele en geestelike konneksie het hulle vriendelik verplig gevoel ten spyte van rooi ligte en waarskuwingstekens. Vir sommige was dit ‘n eenwording met iemand anders… en nou sukkel hulle om die emosionele en geestelike breek te maak, sien dis eintlik ‘n groot gemors.

Ja, daar is gelukkig tweede kanse en oorbeginne, ons dien ‘n genadige God wat ons bitterlik lief het. En ja, miskien het jy in jou verhouding te ver gegaan en oor die tou getrap, maar weet jy wat… jy kan vandag, in hierdie oomblik besluit om dit nie meer te doen nie. Om te stop… en te wag…

Ek wil vandag by jou pleit, neem die besluit om jou huwelik van eendag nou al eerste te stel. Beskerm jou hart… Eer jou ridder op sy wit perd liewe jongmeisie. Jongman bid vir jou vrou van eendag en intussentyd behandel ander meisies asof hulle ‘n ander man se vrou gaan wees. Eer jouself, wees lief genoeg vir jouself en jou lewensmaat van eendag… en wag ‘n bietjie.